1Jo 3 | BOJ | STEP | Bole, gago Abu Qotei a na iga tulaŋ qalaqalaigeqnu! A na iga aqa segi aŋgro tiŋtiŋ sqa marsiq iga giltgej. Deqa iga bole qalieonum, iga Qotei aqa aŋgro bole. Tamo naŋgi mandamq endi unub qaji naŋgi Qotei qa qaliesai. Deqa naŋgi iga qa dego qaliesai.

1 John 3

1 Bole, gago Abu Qotei a na iga tulaŋ qalaqalaigeqnu! A na iga aqa segi aŋgro tiŋtiŋ sqa marsiq iga giltgej. Deqa iga bole qalieonum, iga Qotei aqa aŋgro bole. Tamo naŋgi mandamq endi unub qaji naŋgi Qotei qa qaliesai. Deqa naŋgi iga qa dego qaliesai. 2 O ijo kadoi bole, bini iga Qotei aqa segi aŋgro tiŋtiŋ unum. Ariya mondoŋ iga kiersi sqom di iga qalieosaiunum. Ariya iga qalie, Kristus a olo bamqa iga a unsimqa iga a bul sqom. 3 Tamo kalil Kristus qa tariŋeqnub qaji naŋgo kumbra dena naŋgi naŋgo segi une olo uratoqnsib Qotei aqa ŋamgalaq di jiga saiqoji unub. Agi Kristus a segi jiga saiqoji unu dego kere.

4 Tamo naŋgi une ateqnub qaji naŋgi Qotei aqa dal anjam gotraŋyeqnub. Une atqajqa kumbra ti dal anjam gotraŋyqajqa kumbra ti ombla kerekere. 5 Niŋgi qalie, Kristus a gago une kobotqa bej. A segi une saiqoji. 6 Deqa tamo a Kristus beteryesqas di a une atoqnqasai. Tamo a une atoqnqas di iga unsim qalieqom, a Kristus unosaieqnu. A Kristus qa qaliesai dego.

7 O ijo aŋgro kalil, niŋgi geregere ŋam atoqniye. Tamo bei na bosim niŋgi gisaŋgo uge. Tamo a kumbra tiŋtiŋ dauryqas di a Qotei aqa ŋamgalaq di tamo tiŋtiŋo sqas. Kristus a tamo tiŋtiŋo unu dego kere. 8 Satan a nami une atsiq boqnej agi bini degsi unu. Deqa tamo a une atoqnqas di a Satan aqa tamo sqas. Ariya Qotei aqa Ŋiri a Satan aqa wau kobotqa bej. 9 Qotei na tamo bei ŋambabtqas di a une atoqnqasai. Qotei aqa segi ŋambile aqaq di unu deqa a une atoqnqa keresai. Di kiyaqa? A Qotei aqa segi aŋgro tiŋtiŋ unu deqa. 10 Iga kiersi qalieqom, tamo di a Qotei aqa aŋgro? Tamo di a Satan aqa aŋgro? Iga endegsi qalieqom. Tamo naŋgi kumbra tiŋtiŋ yosaieqnub qaji naŋgi Qotei aqa aŋgro sai. Tamo naŋgi Qotei aqa aŋgro naŋgi qalaqalainjrosaieqnub qaji naŋgi dego Qotei aqa aŋgro sai.

Yesus a na iga qalaqalaiyo kumbra osorgej

11 Nami niŋgi dal anjam endegsib queb. Iga gago Kristen was naŋgi qalaqalainjroqnqom. 12 Iga Kein aqa kumbra dauryqasai. Kein a Satan aqa tamo. A na aqa aube Abel qalnaq moiej. Kiyaqa a na aqa aube qalnaq moiej? Utru agiende. A kumbra uge yo qaji tamo deqa. Ariya Abel a kumbra tiŋtiŋ yoqnej deqa Kein na a qalnaq moiej.

13 O was qu, tamo naŋgi mandamq endi unub qaji naŋgi na niŋgi jeutŋgoqnibqa niŋgi deqa prugosib ulaaib. 14 Iga na gago Kristen was naŋgi qalaqalainjreqnum deqa iga endegsi qalieonum, iga padalqa gam uratosim agi ŋambile gaigai sqajqa gamq di unum. Ariya tamo naŋgi naŋgo Kristen was naŋgi qalaqalainjro-saieqnub qaji naŋgi padalqa gamq di unub. 15 Tamo naŋgi naŋgo Kristen was naŋgi qa are ugeinjreqnu di naŋgo kumbra dena naŋgi na naŋgo was naŋgi ñumobuleqnub. Niŋgi qalie, tamo ñumo qaji tamo naŋgi ŋambile gaigai sqa keresai. 16 Yesus a aqa segi ŋambile uratosiq iga qa moiej. Aqa kumbra dena a na iga qalaqalaiyo kumbra osorgej. Deqa iga dego gago Kristen was naŋgi qa are qalsim gago segi ŋambile uratosim naŋgi qa moreŋqom. 17 Tamo bei a mandam endeqa iŋgi iŋgi koba koroiyosimqa ariya aqa was bei iŋgi saiqoji soqnim unsim a aqaryaiyosaiamqa iga endegsi qalieqom, Qotei aqa qalaqalaiyo kumbra tamo di aqa are miligiq di sosai. 18 O ijo aŋgro kalil, niŋgi quiye. Iga laŋa anjam maro na segi Kristen tamo naŋgi qalaqalainjrqom di keresai. Iga naŋgi bole qalaqalainjrsim kumbra bole bole enjroqnqom.

Iga Qotei aqa ulatamuq di siŋgila na tigelesqom

19 Iga na tamo uŋgasari naŋgi qalaqalainjroqnqom di iga endegsi qalieqom, iga anjam bole dauryeqnum. Deqa iga gago une bei qa are gulubeigimqa uŋgum iga Qotei aqa ulatamuq di are lawo na sqom. Di kiyaqa? Qotei a iŋgi iŋgi kalil qa qalieqo. Aqa qalie dena gago are tulaŋ buŋyejunu. 21 Deqa ijo kadoi bole, iga gago une bei qa are gulubeigwasai di iga Qotei aqa ulatamuq di siŋgila na tigelesqom. 22 Osim iga iŋgi bei qa Qotei pailyimqa a gago pail qusim iŋgi di egwas. Di kiyaqa? Iga aqa dal anjam dauryoqnsim kumbra a tulaŋ areareteqnu qaji di yeqnum deqa. 23 Qotei aqa dal anjam agiende. Iga aqa Aŋgro Yesus Kristus aqa ñam qa gago areqalo siŋgilatosim gago Kristen was naŋgi qalaqalainjroqnqom. Qotei aqa dal anjam di a na nami iga mergnaq quem. 24 Tamo bei a Qotei aqa dal anjam dauryqas di a Qotei beteryesqas. Qotei a kamba dego tamo di beteryesqas. Qotei na aqa Mondor Bole iga egej deqa iga qalieonum, Qotei na iga betergejunu.